ரயில் பணிபுறக்கணிப்பால் உயிரிழந்த பல்கலைக்கழக மாணவருக்கு இழப்பீடு!

புகையிரத பணிப்புறக்கணிப்புக்கு மத்தியில் ஹொரபே பகுதியில் ரயிலின் கூரையில் பயணித்த நிலையில், கீழே விழுந்து உயிரிழந்த மொரட்டுவை பல்கலைக்கழக மாணவரின் குடும்பத்திற்கு 5 லட்சம் ரூபாய் இழப்பீடு வழங்க ரயில்வே திணைக்களம் தீர்மானித்துள்ளது. இக்கருத்தை போக்குவரத்து அமைச்சர் பந்துல குணவர்தன குறிப்பிட்டுள்ளார்.

புகையிரத சேவையை அத்தியாவசிய சேவையாக மாற்றும் விசேட வர்த்தமானி அறிவித்தலையும் ஜனாதிபதி நேற்று இரவு வெளியிட்டார்.

இந்நிலையில், இன்று திட்டமிடப்பட்டிருந்த 13 ரயில் சேவைகள் ரத்து செய்யப்பட்டுள்ளதாக ரயில்வே திணைக்களம் தெரிவித்துள்ளது. மேலும் ரயில் சாரதிகளின் பணிப்புறக்கணிப்பு காரணமாக ரயில் சேவைகளுக்கு பாதிப்பு ஏற்பட்டுள்ளது. வேலை நிறுத்தம் காரணமாக நேற்று (12) 119 ரயில் சேவைகள் ரத்து செய்யப்பட்டன.

அதேநேரம் பல ரயில் நிலையங்களுக்கு இராணுவ பாதுகாப்பு வழங்க நடவடிக்கை எடுக்கப்பட்டுள்ளதாகவும் தெரிவிக்கப்பட்டுள்ளது.